反正我是信了

有件事當我知道時，真係難以置信
講緊係原來利物浦巿區總人口只有四十幾萬！
無錯，我無睇錯你無講錯
呢個人口係講緊同大埔差唔多人口



利物浦講緊起新球場都講咗成十年
當前幾年知道呢個「事實」後
我都幾何相信唔會起得成
一個得四十幾萬人口嘅城巿點養得起兩間球會
每場入場人數四萬幾人
和富大埔踢主場都係得千幾人入場
其實真係已經好勁抽

即係總之每次有波踢
利巿約莫計算十個人已經有一個入咗場
仲要未計算入酒吧睇嗰班

起得成新晏菲路我都好擔心養唔養得起呢個新場
其實依家晏菲路睇聯賽、歐聯當然好似好爆
但再留意吓啲盃賽，晏菲路真係你話入就入
起個新場負擔唔係想像中咁細
當然，如果場場好似奧脫福咁坐爆，收入當然好豐富好多
但投資需要回本，都要一個好長嘅時間
仲要未計算個有無咁多球迷入場呢個風險

利物浦係一個不折不扣嘅老海港城巿
巿內死氣沉沉，去旅行唔係為咗睇波的話
又或者為咗披頭四，真係唔會明去嚟做乜？
先唔計算球會財政同歐聯問題
淨係呢個地點咁悶，都已經較倫敦球會輸蝕好多
所以要吸引 Big Name 加盟，當然難上加難



利物浦要復興講天時地利人和，好似樣樣都爭啲
但作為利撚點都希望有朝一日光榮再臨
你信不信由你，反正我是信了

利物浦廣州之旅

其實我未去過晏菲路
不過每次利物浦嚟亞洲東遊我都有去睇
最開心當然係四年前嚟香港踢英超挑戰盃
班波又唔揸流、留晌香港時間又長
至於其他幾次晌泰國、新加玻睇都唔差
不過今年嚟廣州開波，就真係流過劉華啦



始終中國最興一定唔係英超
你可以話利物浦今次去廣州係「開發新大陸」
但睇現場有半個吉場就知一定係失敗
場內場外除咗無乜氣氛之外，都真係唔識點形容
利物浦自 2003 嚟亞洲後佢次次嚟我次次睇
都真係未試過睇場亞洲之旅係唔掂成咁



講咗咁耐都未講場波
作為今季第一場熱身賽
上半場杜格里殊就派出「猜垃圾」陣容
尼哥無錯係有入波，但幾球插花連日之泉都當佢傻仔
祖高爾差腰就預咗
不過真係要讚費拿根！佢身材唔算好好
但食位速度都唔錯
係繼馬田基利後大家又要留意嘅新仔
總之上半場就咁悶完

下半場換曬牌面上勁嗰堆球員入場
其實都無乜邊腳好波
係查理阿當真係有幾吓睇
而卡奴爾嘅狀態都真係好低吓
我明白，班波係啱啱開操
但都真係唔使踢得咁差畀大家入場觀眾睇呀

成場波最記得反而係完場後
班廣州實Ｑ已經係咁叫人「走啦，無嘢睇走啦」
堅係晌看台趕人走
我都明白我地真係阻佢地放工嘅
隨住班實Ｑ嘅趕客聲
就正式為呢次亞洲之旅嘅回憶畫上揸流嘅句號



補多幾句
我其實有個志願，就係以工作身份接觸利物浦
不過作為球彩台嘅人，就註定無運行
一入公司入錯邊～無計

紅軍今季何去何從？

上季嘅利物浦真係有今生無來世
尤其是上半季真係無得頂
由鶴臣引入嘅球員真係唔使多提
如今好似高捷斯基咁甩到手已經係萬幸

其實以現今熱身賽表現嚟睇
頭三名都不出曼城、曼聯同車路士三隊
前者有錢，後兩者實力都平均
利物浦要挑戰冠軍
我明白呢個目標係每年八月都可以講一次
但真係都有難度
尤其是睇完最近熱身賽嘅演出，就真係難以達成

當然你可以話，熱身賽都係出副選居多
但呢班副選正正係紅軍核心問題在所
嚴重唔夠班
單單數幾個如祖高爾、基加高斯、尼哥
就算連對廣州日之泉都無乜料到
就明白問題幾嚴重
以一季流流長嚟講
利物浦當然可以逞一時之強打贏曼聯、車路士
但下一仗一要對返韋根
只要用返幾個二線兵球隊實力又現晒型

其實無論係正選同班年青新力軍
尤其是後者我都好滿意
大家點都要多謝賓尼迪斯
因為呢班新仔就係由佢重整青訓中心而建立
依家馬田基利、費拿根呢班已經贏盡掌聲
據聞下一代即係細一、兩年嘅嗰班靚仔都唔錯㗎！

講返正題，既然頭三甲大局已定
我對紅軍今季嘅期望就係放晌第四名
歐聯資格對球隊重拾正軌係相當重要
無論晌收購、搵錢，歐聯都係不可劃缺嘅重要賽場
球隊無得踢兩年歐聯已經元氣大傷
嗱，我就唔係話對阿仙奴不敬
不過佢地真係軍心不穩、士氣低沉
有一日雲加領軍都未必有運行
我希望紅軍今季能夠壓過阿仙奴，先上頭四
其餘嘅事，下季再慢慢講啦！

「利迷日誌」計劃啟動

當呢個世代每一個人都係 facebook, twitter

我又有個奇想，不如回歸基本步

幫利物浦寫吓 blog

其實我不嬲都鍾意寫嘢

呢幾年除肥咗之外，都懶咗

始終自己份工已經對住足球

聞時又要寫吓嘢搵食

仲邊有咁多 mood 吖

呢幾年對利物浦嘅感想

都係求其晌 facebook 嗡幾句就算

做得利迷、或者我鍾意容易自己做「利撚」嘅利迷

一定係執著狂

面對呢支球隊十幾廿年都係咁嘔心瀝血

都要堅持落去

呢份精神真係無得頂

無錯，自己讚自己都係「利撚」精神

如果唔係對住呢隊波好容易痴線

十幾年前對利物浦嘅錯愛

一直交纏至今時今日

我一相信 One Life One Love

除咗女朋友同老婆之外

利物浦同樣適用

所以，「利迷日誌」計劃啟動

雖然，唔知可以捱幾耐